أحمد النشوقي يكتب: الكاراتيه التقليدي ولا الكاراتيه الرياضي؟.. قبل ما تختار لطفلك لازم تعرف الفرق

بعد استضافة مصر لبطولة العالم للكاراتيه التقليدي اتفتح كلام كتير عن الفرق بين الكاراتيه التقليدي والكاراتيه الرياضي وظهرت حالة من الجدل بين مُؤيد ومُعارض ووصل الأمر أحيانًا للهجوم على أي حد بيتكلم عن الفروق بين المنظومتين..

لكن بعيدًا عن الخلافات والتعصب خلينا نتكلم بمنطق ونسأل سؤال مهم: إيه اللي هيستفيده اللاعب من النوع اللي بيلعبه؟ وإيه اللي ممكن يضيفه لمستقبله الرياضي؟

أولًا لازم نعرف إن الكاراتيه التقليدي له اتحاد مصري، وله بطولات محلية وأفريقية وعالمية، وله أبطاله وإنجازاته اللي تستحق التقدير والاحترام..

لكن الكاراتيه الرياضي اللي بيتبع الاتحاد المصري للكاراتيه والمنظومة الدولية «WKF» هو المسار المعروف للمنافسات الرياضية الدولية وبيضم بطولات المناطق والجمهورية وأفريقيا والعالم، وكمان عنده نظام تصنيف عالمي للاعبين بالنقاط حسب نتائجهم ومشاركتهم في البطولات المؤهلة..

وهنا الفرق اللي لازم كل لاعب وولي أمر ومدرب يكون فاهمه كويس:

أولًا: مش كل لاعب بيحصل على ميدالية في بطولة عالم بيكون دخل التصنيف العالمي للاعبين.. التصنيف العالمي في الكاراتيه الرياضي له نظام ونقاط وبطولات محددة، ومش كل بطولة خارج منظومة WKF بتضيف نقاط للترتيب ده.

ثانيًا: المشاركة في بطولات العالم وأفريقيا التابعة لـWKF مش مفتوحة لكل اللاعبين. فيه ضوابط ومعايير للتأهل والاختيار، من أهمها التصنيف الدولي والنقاط التي يجمعها اللاعب، كما أن تمثيل الدولة في بعض المنافسات بيكون محدودًا بلاعب واحد وفريق واحد في الفئة المعنية، وفق لائحة البطولة.

ثالثًا: بطولات المدارس الكاراتيه الرياضي له حضور في منظومة البطولات المدرسية، وده بيفتح بابًا للمنافسة واكتشاف المواهب من خلال المدارس والبطولات التعليمية. أما الكاراتيه التقليدي فلا توجد له بطولة مدارس ضمن منظومته المعروفة، ودي نقطة مهمة لولي الأمر اللي مهتم بالمسار الرياضي والتعليمي لابنه.

رابعًا: الحافز الرياضي للطلاب مش أي بطولة جمهورية أو دولية أو عالمية بتمنح صاحبها حافزًا رياضيًا تلقائيًا لأن الموضوع مرتبط باعتماد البطولة والاتحاد والضوابط الرسمية.

رسالتنا مش ضد الكاراتيه التقليدي ولا تقليل من أبطال حققوا إنجازات فيه.. لكن ضد الخلط بين المنظومتين، وضد إن ولي الأمر يدفع فلوس ويتعب ابنه من غير ما يكون عارف قيمة البطولة اللي بيشارك فيها ومستقبلها بالنسبة للاعب.. 

يا كابتن، من حق اللاعب يعرف هو بيلعب في أنهي منظومة، وبيتنافس على إيه، وإيه الطريق اللي ممكن يوصله للمنتخب والتصنيف العالمي.

ويا ولي الأمر، قبل ما تختار النادي أو المدرب أو البطولة، اسأل عن الاتحاد المنظم، واعتماد البطولة، ونظام التصنيف، وفرص الاستفادة من الإنجاز.

في النهاية، الميدالية فرحة وإنجاز لكن الأهم إننا نبني لاعب له مستقبل مش مجرد بطل بصورة على منصة التتويج.

خلوا مصلحة اللاعب فوق أي خلاف، لأن الرياضة في النهاية اتعملت علشان تصنع أبطال، مش علشان تصنع صراعات.. مش كده ولا إيه.