أحمد النشوقي يكتب: السوشيال ميديا.. منبر للرأي أم محكمة بلا قاضٍ؟

السوشيال ميديا بقت جزء أساسي من حياتنا ومحدش يقدر ينكر إن ليها فوائد كتيرة من خلالها بنعرف الأخبار وبنعبر عن رأينا وبنوصّل صوتنا.. وأحيانًا منشور واحد بيقدر يلفت الانتباه لمشكلة حقيقية ويكون سببًا في حلها..

لكن السوشيال ميديا زي «لها ما لها» فبرضه «عليها ما عليها».. والمشكلة مش في السوشيال ميديا نفسها لكن في طريقة استخدامنا ليها.. خصوصًا لما يتحوّل فيسبوك من وسيلة للتعبير عن الرأي إلى منبر لإطلاق الاتهامات من غير دليل أو وسيلة لتصفية الحسابات والخلافات الشخصية..

الغريب بقى إن بعض الناس بقت تتعامل مع بوست على فيسبوك كأنه حكم نهائي.. فواحد يكتب إن فلان عمل كذا أو إن مؤسسة ارتكبت مخالفة كذا وتبدأ التعليقات والمشاركات وكأن الاتهام بقى حقيقة لمجرد إنه اتنشر واتشاف من آلاف الناس..

وهنا لازم نسأل نفسنا: فين الدليل؟ وهل صاحب المنشور متأكد من كلامه؟ وهل سأل الطرف التاني قبل ما يُوجّه له اتهام؟ ولا الموضوع مجرد خلاف شخصي أو محاولة للضغط والانتقام؟

طبعًا من حق أي مواطن ينتقد ويكشف مشكلة ويتكلم عن خطأ شافه وده جزء من حرية التعبير .. لكن فيه فرق كبير بين إنك تقول «أنا شايف إن فيه مشكلة وعايز أعرف الحقيقة» وبين إنك توجّه اتهامًا مباشرًا لشخص أو لمؤسسة وتصدر عليه حكمًا من غير مستند أو دليل..

الأخطر من كاتب المنشور هو الشخص اللي بيعمل «شير» من غير ما يتأكد.. لأن ممكن معلومة غلط تنتشر في دقائق وتوصل لآلاف الناس وتضر بسُمعة إنسان بينما تصحيح المعلومة بعد كده غالبًا مش بيوصل لنفس عدد الناس اللي شافوا الاتهام..

وعشان كده لازم نفتكر إن ورا كل اسم أو صورة بنشوفها على فيسبوك إنسان له أسرة وسُمعة وحياة.. والكلمة اللي بنكتبها ممكن تكون بسيطة بالنسبة لنا.. لكنها بالنسبة لغيرنا ممكن تكون أذى كبير..

السوشيال ميديا مش محكمة.. واللي بيكتب بوست مش قاضي.. واللي بيعمل «شير» مش شاهد .. لو عندك دليل على مُخالفة أو فساد فيه جهات مُختصة تقدر تقدم لها بلاغك وفيه صحافة مهنية تقدر تحقق وتعرض الحقيقة من كل جوانبها..

في النهاية.. مشكلتنا مش إننا بنتكلم لكن تكمن في إنك إزاي بنتكلم وليه بنتكلم وإيه الدليل اللي معانا..
السوشيال ميديا هتفضل لها ما لها وعليها ما عليها.. لكن المسئولية في إيدنا إحنا نخليها منبر للحق والنقد المحترم مش ساحة للاتهامات وتصفية الحسابات وهدم سمعة الناس من غير دليل.