أحمد النشوقي يكتب: فقدوا ساقًا.. لكنهم لم يفقدوا الحلم.. أبطال مصر يبهرون العالم

حكايات كتير في الحياة تستحق التصفيق قبل ما نعرف نتيجتها.. وفيه أبطال مش محتاجين كأس عشان نقول لهم أنتم عظماء
حكاية منتخب مصر لكرة القدم للساق الواحدة في كأس العالم بالمكسيك .. واحدة من الحكايات اللي تخلينا نفتخر ونراجع نظرتنا للحياة.. أبطالنا بدأوا المشوار
بتعادل مع إسبانيا 1-1
وخسارة أمام تركيا 2-1
لكنهم رجعوا وفازوا على نيجيريا 2-1
وتأهلوا لدور الـ16..
وهناك حققوا فوز تاريخي على إنجلترا 2-1
ووصلوا لربع النهائي لأول مرة في تاريخهم..

ورغم الخسارة أمام غانا 0-2 ما استسلموش وفازوا انهارده على اليابان 2-1 ليضربوا موعدًا مع أنجولا للمنافسة على المركز الخامس..

يعني ببساطة: 3 انتصارات وتعادل واحد وهزيمتان.. و8 أهداف سجّلها أبطالنا في مشوار عالمي مشرّف..
بعيدًا بقى عن الأرقام والنتائج فيه درس أكبر من كرة القدم كلها .. إن الإنسان مش باللي فقده لكن باللي قدر يحققه رغم كل الظروف..
الرضا مش معناه إننا نبطل نحلم والطموح مش معناه إن الطريق يكون سهل .. دول أبطال واجهوا الحياة قبل ما يواجهوا المنافسين وقرّروا يكملوا مهما كانت الصعوبات..
رسالة للأبطال.. يمكن ما قدرتوش توصلوا لـ نصف نهائي كأس العالم لكنكم وصلتوا لقلوب ملايين المصريين.. يمكن ما رفعتوش كأس البطولة لكنكم رفعتوا راس بلد بحالها..
أنتم مش أصحاب حلم مستحيل.. أنتم الدليل إن مفيش مستحيل طول ما فيه إرادة .. كل الفخر بيكم.. وربنا يكتب لكم فرحة تليق بتعبكم وكفاحكم.. وتحيا مصر بأبطالها










