أحمد النشوقي يكتب: المصريون في إيطاليا.. أحلام على الضفة الأخرى وواقع لا تحكيه الأرقام

وراء كل حقيبة سفر حكاية.. ووراء كل مصري غادر بلده بحثًا عن فرصة أفضل حلم كبير.. وربما قلق أكبر من المجهول.. لكن هل الحياة في أوروبا كما تبدو في الصور والحكايات التي نسمعها؟.. وهل الوصول إلى إيطاليا يعني بالضرورة الوصول إلى بر الأمان؟..

انهارده الصحافة الإيطالية نشرت تقريرًا مدعومًا بأرقام رسمية لافتة.. أعاد فتح ملف المصريين في إيطاليا.. بعدما كشفت البيانات عن حصول المصريين على أكثر من 32 ألف تصريح إقامة جديد خلال عام 2025 بزيادة 59.4% عن العام السابق وفق بيانات هيئة الإحصاء الإيطالية..

الأرقام هنا مش مجرد إحصائيات عابرة.. لكنها بتفتح الباب أمام سؤال مهم: إيه اللي بيواجه المصريين في الغربة؟.. وهل مجرد الوصول إلى إيطاليا معناه إن رحلة النجاح بدأت فعلًا؟

الحقيقة إن الغربة مش سهلة ومش كل اللي سافر قدر يحقق حلمه.. فيه شباب بيواجهوا صعوبات اللغة.. وآخرون بيعانوا في الحصول على فرص عمل مناسبة.. وأسر بتنتظر لمّ الشمل.. وناس ممكن تقع ضحية استغلال سماسرة أو معلومات مغلوطة عن الإقامة والعمل..

وفي المقابل.. ظهرت خطوات إيجابية لدعم المصريين من بينها اتفاق تعاون بين اتحاد العمال المصريين في إيطاليا واتحاد التعليم الإيطالي يستهدف دعم التعليم وتعلم اللغة ومساعدة الأسر على الاندماج..

وهنا لازم نقول إن النجاح في الغربة مش معناه إنك تشتغل ليل ونهار وبس.. النجاح الحقيقي إنك تعرف حقوقك.. وتحترم قوانين البلد اللي عايش فيها.. وتتعلم لغتها.. وتحافظ على هويتك وكرامتك.

نصيحتي هنا لكل مصري بيفكر يسافر: متاخدش قرارك بناءً على حكايات النجاح وحدها.. اسأل عن طبيعة العمل.. وتكاليف المعيشة.. وشروط الإقامة.. ومتسلمش مستقبلك لسمسار أو وسيط مجهول.. واللي موجود بالفعل في الخارج.. خليك حريص على أوراقك.. واحتفظ بنسخ من عقودك ومستنداتك.. واعرف الجهات الرسمية اللي ممكن تلجأ لها وقت الحاجة..

أما الدولة والكيانات المصرية بالخارج فالمطلوب مش مجرد بيانات واحتفالات بالمصريين في الخارج.. لكن وجود حقيقي وسط الناس.. ومكاتب دعم وإرشاد قانوني ومبادرات لتعليم اللغة والتأهيل المهني ومساعدة الأسر.

المصري في الخارج مش مجرد تحويلات مالية أو رقم في تقرير اقتصادي.. ده إنسان له حقوق وأحلام وكرامة.. ونجاحه الحقيقي إن الغربة تكون طريقًا لحياة أفضل.. مش رحلة مفتوحة من المعاناة.. وفي النهاية.. تفضل الغربة تجربة فيها المكسب والخسارة.. والنجاح والتحديات.. لكن الأكيد إن الوعي هو أول طريق الأمان وإن المصري أينما كان يقدر ينجح ويحافظ على هويته وكرامته.. ويكون خير سفير لبلده.. مش كده ولا إيه